Толқынбаев Тұрсынхан

Толқынбаев Тұрсынхан 1946 жылы 26 наурызда Аманкелді атындағы ұжымшарда дүниеге келген. Буденовка (Түймекент) ауылындағы Ақжар орта мектебінде оқыған. 1974 жылы Қазақ мемлекеттік университетінің журналистика факультетін бітірген. Қазақстан Журналистер Одағының мүшесі. 

Журналистік қызметін жоғары оқу орнын бітірген соң аудандық «Ауыл жаңалығы» газетінде бастаған. Тілші, бөлім меңгерушісі, жауапты хатшы болып істеген. 

1986 жылы облыстық «Еңбек туы» (қазіргі «Ақ жол») газеті редакциясына қызметке шақырылды. Алғаш тілші, аға тілші болып жұмыс істеп, 1990 жылы партия тұрмысы бөлімінің меңгерушісі-редакциялық алқа мүшесі болып бекітілді. Кейін газеттің жетекші экономикалық бөлімдерін басқарып, жауапты хатшы, бас редактордың орынбасары қызметтерін атқарды. 2009 жылдың тамызынан зейнет жасына жеткен соң бас редактордың кеңесшісі болып, журналистік қызметін жалғастырып келеді. 

Шығармашылық белсенділігі мен көп жылғы жақсы жұмысы, озық тәжірибені насихаттап, экономиканың аграрлық секторындағы реформалардың барысын кәсіби шеберлікпен көрсете білгені үшін Тұрсынхан Толқынбаев Қазақ КСР Жоғары Кеңесінің Құрмет грамотасымен, ҚР Президенті Н.Ә.Назарбаевтың Алғыс хатымен, Қазақстан Журналистер Одағының Құрмет грамотасы және Дипломымен, екі дүркін Жамбыл облысы әкімінің Құрмет грамотасы және облыстық мәслихаттың грамотасымен марапатталынған. Ол облыс әкімі тағайындаған «Ауыл жылы» сыйлығының тұңғыш иегері, облыс әкімдігі жариялаған аграрлық азық-түлік бағдарламасын насихаттаудағы журналистер арасындағы 2003-2004 жылдары өткізілген конкурстың бірінші орын жүлдегері.