Битабаров Бөкенбай

Битабаров Бөкенбай Ізтілеуұлы 1959 жылы 7 шілдеде Байзақ ауданының Түймекент ауылында қызметкер отбасында туылған. Әкесі Битабаров Ізтілеу Бадайұлы 1917 жылы туылған, ол Кеңес-фин, Кеңес-герман соғыстарына қатысқан. 

Битабаров Бөкенбай 1966 жылы «Трудовой пахарь» колхозының орталығындағы Ақжар орта мектебінің бірінші сыныбына оқуға барып, 1976 жылы осы мектептің оныншы сыныбын бітірді. Еңбек жолын «Трудовой пахарь» колхозында механизатор болып бастаған. 1979-1981 жылдары Кеңес Армиясы қатарында жігіттік борышын өтеген. Әскерден келген соң, 1981-1983 жылдары жүргізуші болып жұмыс істеді. 

1983-1987 жылдары колхозда техника қауіпсіздігі инженері болып жұмыс атқарды.

1987 жылы Жамбыл гидромелиорация ­– құрылыс институтын инженер-механик мамандығы бойынша бітірді. 1987-1991 жылдары ауыл шаруашылығы машиналары меңгерушісі (зав. машинным двором) болып қызмет атқарды. 1991-1992 жылдары колхоздағы № 2-егіс бригадасының бригадирі, 1993-1994 жылдары бас агроном, 1994-1996 жылдары бас инженер, 1996-1999 жылдары «Трудовой пахарь» ұжымшарының бастығының орынбасары лауазымдарында қызмет етті. 

Өткен ғасырдың тоқсаныншы жылдарының ортасында шаруашылықтар тарап, жұрт жұмыссыз қалған жоқ па?! Әсіресе, көзін шаруамен ашқан ауылшаруашылығы мамандарына қиын болды. Шаруашылықтың жыл он екі ай кезең-кезеңімен келетін науқандық жұмыстарынан бай тәжірибе жинақтап, бір шаруашылықты басқарса, дөңгелетіп әкетеді-ау деген білікті мамандардың қатарында «Трудовой пахарь» колхозының бас инженері Бөкенбай Битабаров та бар еді. Жұртқа мәлім бұл шаруашылық облыста оза шапқан озат шаруашылық болатын. Еңбек Ері А.Нахмановичтай білікті басшының басқаруымен шаруасы шалқыған колхозда мықты мамандар өсіп шықты. Осында өмірге келіп, Жамбыл гидромелиоративтік-құрылыс институтын бітіріп, еңбекке білек сыбана кіріскен жас маман Бөкенбай Битабаров автомеханик, жөндеу шеберханасының меңгерушісі, бас инженеріне дейінгі жолдан өтті.

Нарық заманында тараған колхоздың орнында шағын шаруашылықтар пайда болды. Қазір сол алғашқы шаруашылықтар ұмыт болды. Орнын жаңасы басуда. Алайда, 1999 жылы «Достық-99» шаруа қожалығын құрған білікті маман Бөкенбай Битабаровтың қожалығы осы жылдар аралығында тек өрлеу, өсу үстінде болды. Осы ауылдың 300 тұрғынының басын біріктіріп, олардың үлесіндегі жер телімдерін игеріп, ұқсатып отырған Бөкенбайға ауыл тұрғындарының алғысы шексіз. 

Жылды ондаған миллион теңге таза пайдамен аяқтап жүрген шаруашылықтың шаруасы кеңіп, жұмыс ауқымын ұлғайтуы заңды-ақ. Бюджет қоржынына қомақты қаржы аударып, аудан экономикасының артуына сүбелі үлес қосып жүрген шаруашылық – аудан мақтанышы. Биылдың өзінде ауылішілік жолдар жөнделіп, көгілдір отын кіріп ауылдардың берекесі кіріп жатса, ол осындай табысы мол кәсіпкерлер еңбегінің арқасы. Солардың арасында білікті маман, ұйымдастырушылық қабілеті бар Бөкенбай Битабаровтың еңбегі ерен екендігі даусыз.

         2003, 2007 жылдары екі мәрте үздік фермер атағын алды. Жамбыл облыстық шаруашылық байқауында үшінші орынды иеленді. Оның есімі Қазақстанның «Алтын кітабына» енгізілді. Бірнеше рет аудан, облыс әкімдерінің Құрмет грамотасымен, аудан, облыс мәслихатының Құрмет грамотасымен, ауыл шаруашылық министрінің Алғыс хатымен марапатталды. «Конституцияға 10 жыл», «Астанаға 10 жыл» медальдарымен, кәсіподақ ұйымының І, ІІ, ІІІ дәрежелі Даңқ төсбелгісімен марапатталды. 2014 жылы желтоқсанда Байзақ ауданының Құрметті азаматы атағы берілді. Ол «Нұр-Отан» партиясының мүшесі. ҚР Президентінің Алғыс хатымен марапатталған. 

         Битабаров Бөкенбай зайыбы Бейсенбаева Гүлнар бірге жанұяда 3 ұл, 1 қыз, 6 немере тәрбиелеп отырған үлгілі отбасы.