Туғанбаев Сәбденәлі
Туғанбаев Сәбденәлі 1923 жылы мамыр айында Жамбыл облысы Байзақ ауданы Сухамбаев ауылдық округінің Көкөзек ауылында қарапайым шаруаның отбасында дүниеге келген. 1942 жылы Свердлов ауданының әскери комиссариатының шақыру қағазын алды. Бір ауылдан Тілепалды, Әшім, Өрік деген жігіттермен бірге Сәбденәлі төртеуі Алматыдағы 147-ші запастағы кавалериялық полкке келіп түсті.
Көп ұзамай, 1943 жылы ақпан айында Сталинград майданында соғысады. Кейін Минск, Харьков қалаларын азат етуге қатысады. Ізінше Батыр қала – Киев қаласын жау қолынан азат ету шайқастарына қатысты. 1944 жылдың қазан айында Карпаттағы немістердің тылына жібереді.
С.Туғанбаев құрамында болған полк қайта толықтырылып, Польша арқылы Германияның бұрынғы шекарасын басып өткенде 1945 жылдың 22 қаңтары болатын. Сөйтіп, сақа жауынгер Сәбденәлі неміс фашистерін өз ордасында талқандауға қатысып, 1945 жылдың қыркүйек айында туған ауылына оралды.
Мемлекет С. Туғанбаевтың соғыстағы ерлігін бағалап,оған I дәрежелі “ Отан соғысы” орденімен, “Ерлігі үшін” медалімен марапаттады. Одан басқа алғыс хат пен I Украина майданы қолбасшысының мақтау қағаздары да бар.
Соғыс ардагері Туғанбаев Сәбденәлі бейбіт өмірге араласқаннан кейін де қажырлы еңбегімен көзге түсті. Ұзақ жылдар бойғы ұстаздық қызметі үшін «Ленин», «Құрмет белгісі» ордендерімен және «Еңбектегі ерлігі үшін» медалдарымен марапатталды. Оған КСРО және Қазақстан КСР халық ағарту ісінің үздігі, «Аға мұғалім» құрметті атақтары берілді.